Mæla frá hægri botnfrádrátti í kommunuskattinum

Meirilutin í Fíggjarnevndini hjá løgtinginum, umboðini hjá samgonguni og Kristin Michelsen, hava ta fatan, at kommunurnar hava avmarkaðan áhuga í at áseta botnfrádáttin í skattinum sjálvar. 

Fíggjarnevndin hevur skrivað álit um uppskotið hjá Fólkaflokkinum um at lækka botnfrádráttin í kommunuskattinum, so lægstu inntøkurnar fáa skattalætta.

Fólkaflokkurin skjýtur upp, at kommunurnar skulu fáa heimild at hækka botnfrádráttin úr 30.000 upp í 65.000 krónur. Frádrátturin í landskattinum er 65.000 kr.

Fíggjarnevndin hevur havt málið síðani 15.november.

Meirilutin mælir frá at samtykkja uppskotið.

Meirilutin heldur tó, at heimild til kommunurnar sjálvar at áseta botnfrádráttin í kommunuskattinum kundi givið kommununum eitt kærkomið skattligt stýringaramboð afturat kommunuskattaprosentinum og barnafrádráttinum. 

Ringar avleiðingar

Men neiligu avleiðingarnar eru størri. Millum annað kann hugsast, at smáu kommunurnar ikki fara at standa seg í kappingini um at draga fólk til sín. 

Meirilutin hevur eisini ta fatan, at áhugin hjá kommununum fyri møguleikanum sjálvar at áseta botnfrádráttin er avmarkaður.

Andstøðumenninir í Fíggjarnevndini mæla tinginum til at samtykkja uppskotið hjá Fólkaflokkinum. 

Uppskotið lættir um skattabyrðuna hjá teimum lægst løntu, sum bara rinda kommunuskatt, sigur minnilutin.  
 
Fólkaflokkurin hevði eitt líknandi uppskot í síðstu tingsetu, men tað vann ikki frama.