Fíggjarnevndin tekur undir við grannskoðarunum

Fíggjarnevndin hjá løgtinginum tekur undir við Landsgrannskoðanini og løgtingsgrannskoðarunum, sum finnast hvassliga at landsstýrinum, nú landsroknskapurin fyri 2016 er granskoðaður. 

Nevndin heldur fast um, at løgmaður eigur at seta landsstýrinum tíðarfreistir fyri, nær viðurskiftini skulu fáast í rættlag. 

Fíggjarnevndin nevnir Mentamálaráðið, sum alt fyri eitt eigur at fáa roknskaparreglugerðirnar hjá Granskingarráðnum og Granskingargrunninum góðkendar og í tí sambandi fáa staðfest, hvussu møguligt avlop av óbrúktari játtan skal viðgerast. 

Umhvørvisstovan eigur at tryggja, at roknskapurin er rættur.

Orsøkin til, at hann ikki er rættur, er millum annað, at starvsfólk eiga ella skylda nógvar lønartímar. 

Tað kann ikki góðtakast, sigur Fíggjarnevndin, at Jarðfeingi av sínum eintingum gevst at skráseta arbeiðstíð við teirri grundgeving, at ásetingarnar eru ógreiðar. 

Dagført yvirlit

Fíggjarnevndin vísir eisini á, at stovnar hava ikki dagført yvirlit yvir ognir og útbúnað. 

Nú skulu bara ognir, sum eru verdar meira enn 50.000 kr., skrásetast.

Tí er eingin góð undanførsla longur fyri ikki at skráseta ognirnar, sigur Fíggjarnevndin. 

Fíggjarnevndin er samd við løgtingsgrannskoðarnar um, at grannskoðarin hjá Búnaðargrunninum eigur at lata løgtingsgrannskoðarunum alla grannskoðanarprotokollina. 

Nevndin heldur, at ein loysn er, at Landsgrannskoðanin grannskoðar roknskapin hjá Búnaðargrunninum.