Ríkmaður rindar burkabøtur

Ríkmaðurin Rachid Nekkaz leggur seg nú út í kjakið um burkabann í Danmark.

Ríkmaðurin, sum er av franskt-algeriskum uppruna, sigur seg longu hava goldið 1538 bøtur fyri kvinnur í Fraklandi, Belgia, Sveis og Týsklandi, sum hava fingið dóm og harvið bót fyri at ganga við burka. Tilsamans er talan um meira enn tvær milliónir krónur.

Í Danmark fer fólkatingið væntandi í næstum at samtykkja burkabann. Rachid Nekkaz sigur við Kristeligt Dagblad, at hann ætlar sær at gera tað, hann er mentur, fyri at ein tílík lóg onga ávirkan fær á tær kvinnur, sum brúka burka.

- Tað skal steðgast

Hann ætlar sær tí at gjalda bøturnar fyri kvinnurnar.

- Míni boð til fólkatingið er, at tað gevur onga meining at samtykkja eitt burkabann, tí kvinnurnar koma kortini ikki at gjalda bøturnar, sigur Rachid Nekkaz.

Boðini fáa danskar politikarar at umhugsa at herða ásetingarnar í lóggávuni.

- Eins og vit ikki góðtaka, at onkur annar rindar fartbøturnar fyri tey, sum koyra ov skjótt, so góðtaka vit ikki eitt tílíkt stig. Hann máar burturav danskari lóggávu, og tað skal steðgast, sigur Naser Khader, framsøgumaður í rættar- og innflytaramálum hjá Konservativa flokkinum.

Sjálvstýri vildi eisini forbjóða

Í oktober í fjør boðað Sjálvstýri frá, at flokkurin hevði latið løgtinginum eitt uppskot um at forbjóða burka og niqab.

Burka er turriklæðið, sum fjalir alt andlitið, og niqab er turriklæði, sum fjalir alt uttan eyguni. Uppskotið varð tó ongantíð lagt fyri løgtingið.