Búskaparráðgevi hjá Trump leggur frá sær

Fremsti, búskaparligi ráðgevin hjá amerikanska forsetanum leggur frá sær.

Avgerðin hjá Gary D. Cohn kemur, eftir at Donald Trump boðar frá handilskríggi við fleiri av heimsins londum fyri á tann hátt at verja arbeiðspláss heima í USA.

Forsetin ætlar at leggja høgan innflutningstoll á eittnú stál og aluminium. Eitt stig, sum elvir til hvøss mótmæli úr Kina, ES og eisini grannalondunum Kanada og Meksiko.

Gary D. Cohn kom úr einum leiðandi starvi í íløgubankanum Coldman Sachs, tá hann eftir forsetavalið varð biðin til fremsta, búskaparliga ráðgeva hjá Donaldi Trump.

Sambært blanum The New York Times er Gary D. Cohn persónliga ein talsmaður fyri fríhandli, og hann er harðliga ímóti avgerðini hjá forsetanum at seta í gildi innflutningstoll.

Cohn er tann seinasti í eini røð av leiðandi starvsfólki í Hvítu Húsunum í Washington, sum stingur í sekkin.

Ein uppgerð, gjørd á eitt árs degnum fyri forsetaskeiðið hjá Trump, vísir at triðingurin av starvsfólkunum eru skift út síðani hann tók við sum forseti, 20. januar í fjør.