Royal Greenland manningamangul

Sermitsiaq skrivar, at ein triðingur av 476 yvirmonnum hjá Royal Greenland skulu pensjonerast í 2030, og sambært hagstovuni í Grønlandi eru bara sjey maskinmeistarar og seks maskinistar útbúnir í og uttan fyri Grønland í tíðarskeiðinum frá 2003 til 2015.

Tølini fyri útbúnar skiparar eru heldur ikki nøktandi, sigur Royal Greenland, sum hevur sent grønlendska Fiskimálaráðnum eina frágreiðing um trupulleikan.

Tað er heldur ikki nóg mikið bara at vera útbúgvin og hava prógv.

- Tá ein er útbúgvin skipari, stýrimaður ella maskinmeistari, so merkir tað ikki, at ein kann fara beint í hesi størvini, tí sjóvinnubræv og onnur sertifikat eru kravd fyri at lúka krøvini tildømis at sigla í altjóða sjógvi, stendur í frágreiðingini.

Støðan er tí, sambært Royal Greenland, at flotin næstu 5-15 árini stendur fyri stórari útskifting, og at neyðug orka at nøkta tørvin ikki er í Grønlandi.

- Tá neyðuga arbeiðsmegin ikki finst, samstundis sum manningarkunngerðin verður dagførd, so fáa reiðaríini torførar fortreytir at virka undir, sigur Royal Greenland, sum eisini fílist á, at myndugleikarnir ikki gera nóg mikið, tá tað snýr seg um sjóvinnuútbúgvingar.

- Í Grønlandi hava vit ein skipara- og siglingarskúla. Men okkum tørvar eisini maskinskúla og útbúgvingar í fiskivinnutøkni, um Grønland skal kunna vera sjálvbjargið við útbúnari arbeiðsmegi til sjógvin, stendur í frágreiðingini, sambært Sermitsiaq.