Mæla til at byggja nýggja læknamiðstøð í Havn

Nú er eitt uppskot komið afturat um læknamiðstøð í Havn.

Seks býráðslimir í Javnaðarflokkinum og Sambandsflokkinum, sum eru minnilutin í býráðnum, mæla til at byggja eina læknamiðstøð í Gundadali til seks kommunulæknar, heldur enn at leiga frá Betri-samtakinum á Smyrilsvegi fyri slakar 246.000 krónur. um mánaðin, og tá er meirvirðisgjald ikki íroknað. 

Býráðið skal viðgera bæði uppskotini um nýggja læknamiðstøð í Havn hóskvøldið. 

Javnaðarflokkurin og Sambandsflokkurin siga, at tað er skilabetri at byggja enn at leiga.

Flokkarnir mæla til at byggja við Oknarveg, har kommunan eigur grundstykki. 

Teir mæla frá at leiga og umbyggja ein ogn, sum kommunan ikki eigur, og sum ikki er bygd til endamálið.