Eingin vil gjalda fyri eldsløkkingina á Tvøroyri

Ósemja er um, hvør skal gjalda rokningina fyri arbeiðið, sum báturin hjá MEST, Samson, gjørdi, tá eldur var í Varðanum Pelagic fyri einum ári síðani. 

Tvøroyar kommuna vil ikki gjalda, tí býráðið heldur uppá, at eldurin var so mikið stórur, at hann kemur undir ta tilbúgving, sum landið eigur at gjalda.

Men landið vil heldur ikki gjalda rokningina.

Tí endaði hon aftur á Tvøroyri.

Rokningin er 205.000 kr., men pengarnir eru ikki avgerandi í hesum føri, sigur býráðið á Tvøroyri.

Sambært býráðnum, sum viðgjørdi málið í gjár, er talan um eitt "prinsippmál", ikki eitt pengamál.