Erdogan valt versonin til fíggjarmálaráðharra

Turkiski forsetin, Recep Erdogan, sum í gjár varð svorin í eið undir nýggju politisku skipanini í Turklandi, hevur útnevnt verson sín til fíggjarmálaráðharra. 

Bloomberg skrivar, at avgerðin elvir til órógv á partabrævamarknaðunum, sum stúra fyri nepotismu ovast á landsins valdsstiga.

BBC skrivar, at Erdogan hevur lovað, at hann fer at brúka sítt nýggja økta vald til at dríva Turkaland fram á leið.

Andstøðingar óttast hinvegin, at forsetin, sum nú kann stýra landinum við fyriskipanum, fer at oyðileggja tað, sum eftir er av fólkaræði í Turkalandi.

Turkaland er farið frá eini skipan við parlamentarismu og forsætirráðharra, sum hevur verið í gildi, síðani nýggja turkiska lýveldið varð stovnað fyri 95 árum síðani.

Forsetin kann nú útnevna ráðharrar og varaforsetar, umframt at blanda seg í lóggávuna í landinum.

- Vit fara nú frá eini skipan, sum hevur kostað okkara landi dýrt í politiskum og fíggjarligum ruðuleika, segði Recep Erdogan í parlamentinum í Ankara í gjár, skrivar BBC.