Vivian Motzfeldt fer upp í Demokraatit

Grønlendski politikarin, Vivian Motzfeldt, skiftir flokk og fer upp í Demokraatit.

Tað skrivar formaðurin í flokkinum og formaðurin í grønlendska landsstýrinum, Naalakkersuisut, Jens-Frederik Nielsen, á Facebook.

Motzfeldt er fyrrverandi grønlendskur uttanríkisráðharri.

Hon fór úr Siumut-flokkinum í marsmánaði, tá ið aðalstjórnin í Siumut gjørdi av, at flokkurin skuldi fara úr grønlendsku stjórnini.

- Hon hevur nógva vitan og drúgvar royndir, sum eru virðismiklar fyri arbeiðið hjá okkum, skrivar Jens-Frederik Nielsen.