Brúgv rapað: Eftirlitið var ikki nóg gott

Í Italia eru 38 fólk deyð, tí Morandi-brúgvin í býnum Genova rapaði í gjár.

Nú finst Danilo Toninelli, sum er ráðharri í samferðslumálum, harðliga at fyritøkuni Autostrade, sum umsitur og hevur ábyrgdina av at halda gjaldsvegin við líka.

- Stjórnin í fyritøkuni eigur at leggja frá sær beinanvegin, heldur ráðharrin.

Fyritøkan rekur í alt trýtúsund kilometrar av vegi í Italia.

Tað var ein motorvegsbrúgv í 100 metra hædd oman fyri partar av Genova, sum rapaði í gjár.

Størsti parturin rapaði yvir eina á í býnum, men hús og verksmiðjur vóru eisini rakt. Brúgvin var bygd í 1967.

Samferðslumálaráðið í Italia sigur seg nú fara at kanna aðrar vegir og brýr, sum eru bygdir um sama mundi.

Eftir øllum at døma hevur eftirlitið við brúnni ikki verið nóg gott.

Brúgvin var heldur ikki bygd til ta ferðslu, sum hevur verið á brúnni seinastu árini.