Vilja brúka vakmyndatól í íslendsku fiskivinnuni

Ætlanin er at ansa eftir, at allar lógir verða hildnar. Vakmyndatól skulu setast upp allastaðni, í skipum, havnum, flutningstólum og fiskavirkjum - í øllum liðum í fiskivinnuni. Fiskimálaráðið ætlar eisini at brúka dronur til eftirlitið.

Vinnan ávarar móti hesum eftirliti, sum kann gerast ein fyrimynd hjá øðrum. Endin kann gerast tann, at Ísland gerst eitt eftirlitssamfelag, sum vit annars bara kenna úr skaldsøgum og filmum.

Vinnan heitir á Fiskimálaráðið um at brúka annað eftirlit, sum er hóskandi í Vesturheiminum, har sum nógv tey flestu halda lógir og reglur, heldur enn at gera eitt eftirlit, sum ger øll í fiskivinnuni illgrunaverd. 

Fyrr í ár gjørdi Dátueftirlitið í Føroyum vart við, at ikki er loyvt at brúka vakmyndatól fyri at hava eftirlit við starvsfólkum. 

Dátueftirlitið varð vorðið varugt við, at vakmyndatól vóru vanlig á føroyskum fiskiskipum. 

Dátueftirlitið gjørdi greitt, at vakmyndatól bara kunnu verða brúkt til lóglig og saklig endamál sambært lógini um persónsupplýsingar, og at Dátueftirlitið ongantíð góðtekur, at vakmyndatól verða brúkt til at hava starvsfólk undir støðugum eftirliti.