Føroyar dotnar trý pláss niður á styrkilistanum

Føroyska A-landsliðið við monnum er dottið trý pláss niður á styrkislistanum hjá FIFA og er nú nummar 95 av teimum 211 limalondunum. 

Á UEFA-listanum, evropeiska listanum, eru Føroyar nummar 44 av 55 limalondum.

Nú leygardagin 17. november klokkan 17.00 føroyska tíð spæla Aserbadjan og Føroyar á Baki Olimpyia Stadion í Baku í Aserbadjan.

Týsdagin 20. november klokkan 19.45 føroyska tíð spæla Føroyar seinasta dystin í UEFA Nations League bólkaspælinum, tá Malta tekur ímóti á National Stadion í Ta’Qali á Malta.

Aserbadjan er nummar 34 á listanum hjá UEFA og Malta nummar 39.

Næsta avbjóðing hjá landsliðnum verður undankappingin til EM í 2020,.

Lutakastið verður fyrst í desember. Tá verða londini skipað eftir styrkislistanum hjá UEFA. 

Á styrkislistanum hjá evropeisku fótbóltssamgonguni fyri kvinnulandslið eru Føroyar nummar 42 av 49 londum, og nummar 84 av 177 londum á styrkislistanum hjá FIFA. 

Í februar næsta ár verður greitt, hvørji mótstøðulondini hjá føroysku kvinnunum verða í næstu EM-undankappingini, sum byrjar í august, skrivar Fótbóltssambandið.