Bush fer til gravar hósdagin

Fyrrverandi amerikanski forsetin, George Herbert Walker Bush, sum doyði fyrradagin, fer til gravar hósdagin. Hann verður grivin í býnum, College Station, í Texas. Longu í morgin byrjar minningarhaldið um 41. amerikanska forsetan, sum bleiv 94 ára gamal og harvið landsins elsti fyrrverandi forseti nakrantíð.

Frá seinnapartinum í morgin til mikumorgunin stendur gamli Bush undir børu á Capitol Hill í Washington D.C. Seinni mikudagin er minningargudstænasta í dómkirkjuni í høvuðsstaðnum. Mikudagur er almennur sorgardagur í USA, hava Hvítu húsini boðað frá. Kistan við George Bush skal eisini standa nakrar tímar í Houston, har fyrrverandi forsetin búði, áðrenn sjálv jarðarferðin verður í grannabýnum, College Station, hósdagin.

George Herbert Walker Bush var forseti í USA  frá 1989 til 1993. Áðrenn tað var hann varaforseti hjá Ronald Reagan í átta ár.