Undantaksstøðan í Ukraina sett úr gildi

Hernaðarliga undantaksstøðan, sum varð sett í gildi í pørtum av Ukraina 25. november, í kjalarvørrinum á kreppuni við Russland, fór úr gildi í dag.

Tað boðaði Petro Porosjenko, forseti, landsins trygdarráði frá, skrivar Reuters.

Undantaksstøðan varð sett í gildi, eftir at russiskar deildir skutu eftir ukrainskum herflotaskipum við umstríddu Krim-hálvoynna, sum Russland legði undir seg í 2014.

Russland legði síðani hald á ukrainsku skipini.

Vildu ikki akta

Russar søgdu, at skipini vórðu tikin, tí tey sigldu í russiskum sjógvi, og tey aktaðu ikki boðini um at fara haðani.

Ukrainskir myndugleikar søgdu, at skipini høvdu ikki fyri neyðini at biðja um loyvi at sigla har á leiðini.

Fyrr í hesum mánaðinum segði Porosjenko, forseti, at hann hevði ongar ætlanir um at leingja undantaksloyvið, uttan so at russar lupu á.

Lógin um undantaksstøðu í Ukraina gevur forsetanum víðar heimildir. Hann kann m.a. seta forboð fyri at ganga úti og at skerja pressufrælsið.

Áðrenn ukrainska tingið samtykti undantakslógina, lovaði forsetin, at hann hann ætlaði ikki at skerja frælsið hjá vanliga borgaranum.