Kristina í finaluna

Seinna hálvfinalan í íslendska melodi grand prix-kappingini var í gjárskvøldið, og nú er greitt, at tveir føroyingar verða við í finaluni. Tað skrivar portal.fo. 

Sjálvt um Kristina Bærendsen ikki kom við í fyrru hálvfinaluni, er tað soleiðis, at umframt teir tveir sangirnir, ið eru valdir í hvørjari hálvfinalu, velur dómsnevndin ein fimta sang. Og í gjár varð avdúkað, at dómsnevndin hevur valt sangin hjá Kristinu Bærendsen at luttaka í finaluni, sum verður í mars.

Hin føroyingurin, sum verður við í finaluni, er Jógvan Hansen, ið er kórsangari hjá Friðrik Ómar, sum Jógvan Hansen eisini hevur samstarvað við áður. 

Til fyrru hálvfinaluna sang Kristina Bærendsen sangin "Ég á mig sjálf", sum á føroyskum merkir "Eg eigi meg sjálva". Men til finaluna sleppur hon at framføra ensku útgávuna "Mama Said".

Tann, sum vinnur finaluna, sleppur at umboða Ísland í altjóða Eurovision sangkappingini, sum verður hildin í mai. Ísrael vann kappingina í fjør, og tí verður ársins altjóða kapping hildin í Tel Aviv.