Ovurfiti og tunglyndi ganga hond í hond hjá børnum

Vandin fyri at fáa sálarligar trupulleikar orsakað av ovurfita veksur so líðandi gjøgnum barnaárini, vísir ein stór bretsk kanning, sambært BBC.

Fleiri enn 17.000 børn, sum eru fødd millum 2000 og 2002, luttóku í kanningini, sum tveir granskarar úr Liverpool hava gjørt.

Kanningin hugdi ikki at orsøkum, men granskararnir siga, at tað er sannlíkt, at fátækradømi er ein orsøk til bæði ovurfita og sálarligar trupulleikar.

Gentur hava fleiri trupulleikar

Kanningin hugdi at hædd og vekt hjá børnunum, og frágreiðingum frá foreldrunum um sálarheilsuna hjá børnunum, tá tey vóru trý, fimm, sjey, 11 og 14 ára gomul.

Frá sjey ára aldri vísti tað seg at vera eitt tætt samband millum ovurfita og sálarligar trupulleikar.

Genturnar høvdu hægri BMI og fleiri sálarligar trupulleikar enn dreingirnir. 

Mugu fyribyrgja ovurfita hjá børnum

Úrslitini av kanningini, sum JAMA Psychiatry hevur útvivið, styrkja um orsøkina til at fyribyrgja ovurfita hjá børnum, siga granskararnir. 

Dr. Charlotte Hardman, undirvísari í sálarfrøði á University of Liverpool, sigur, at tað er tó ikki so einfalt, sum at eta minni.

- Fólk halda, at ein bara kann eta minni og íðka meira, men tað er nógv meira samansett enn tað. Ovurfiti og sálarligir trupulleikar eru samanfløktir, sigur hon. 

- Prosenttalið av ovurfita og sálarligum trupulleikum hjá børnum er vaksandi, og tí er tað ein almenn søk at skilja, at tey hanga saman, og bæði hava tey samband við vánaliga heilsu í vaksnamannaárunum, sigur Charlotte Hardmann.