Fara til Syðrugøtu at útflyta tónleik

Gissur Patursson er fyrsti formaðurin í stýrinum fyri Tónleikaútflutningsstovuna.

Hini í stýrinum eru Mikael Blak, Fróði Stenberg og Unn Patursson.

Tónleikaútflutningsstovan, sum á enskum eitur Faroe Music Export (FMX), skal virka fyri at økja um útflutningin av føroyskum tónleiki og menna føroysku tónleikavinnuna í tøttum samstarvi við tónleikafyritøkur, tónleikarar og vinnugreinafeløg.

Tónleikaútflutningsstovan er partur av føroysku vinnuframaskipanini, og Vinnuframi fer at hjálpa henni við bókhaldi og fyrisiting.

Eysturkommuna bjóðaði seg tíðliga fram at hýsa Tónleikaútflutningsstovuni, og hon verður í Valhøll í Syðrugøtu, har sum G! festivalurin eisini hevur heimstað. 

Landsstýrisfólkið í vinnumálum setur eitt fólk í stýrið og annars verður stýrið mannað eftir tilmæli frá Mentamálaráðnum, sum tilnevnir ein stýrislim, og frá tónleikavinnuni, sum tilnevnir tveir.

800.000 kr. eru í fíggjarlógini fyri 2019 til Tónleikaútflutningsstovuna. 

Ætlanin er at hækka játtanina upp í eina millión krónur næsta ár.