Hallur Hansson hevur longt sáttmálan

Føroyski landsliðsmiðvallarin, Hallur Hansson, hevur longt sáttmálan við superligufelagið, AC Horsens.

Nýggi sáttmálin er galdandi til árslok í 2021

Hallur Hansson hevur verið millum profilarnar í felagnum, síðan hann kom til AC Horsens úr Vendsyssel í 2016, og nú tekur hann tvey ár afturat í felagnum.

Skal seljast til størri felag

Venjarin hjá AC Horsens, Bo Henriksen, fegnast um, at tað hevur eydnast at leingja sáttmálan við Hall Hansson.

Men hann sigur eisini við heimasíðuna hjá felagnum, at føroyski miðvallarin helst verður seldur til eitt størri felag

-Hallur er ein dugnaligur spælari, og vit skulu øll arbeiða í felag fyri, at hann kann taka næsta stigið, sum er at skriva sáttmála við eitt størri felag, sigur Horsens-venjarin við heimasíðuna hjá AC Horsens.

Hallur Hansson er í føroyska landsliðshópinum sum komandi dagarnar skal spæla EM-undankappingardystir ímóti Spania og Noregi.