Søguliga lágt burðartal í Íslandi

Burðatíttleikin í Íslandi er søguliga lágur. Tað skrivar Frettablaðið. Í miðal fær hvør íslendsk kvinna millum 1,7 og 1,8 børn, samanborið við 2,9 børn fyri 40 árum síðani.

Tað sigur Óløf Garðardóttir, professari í sosialsøgu á lærda háskúlanum í Reykjavík. Kortini minkar fólkatalið ikki, og tað er tí, at íslendingar liva longri enn fyrr, sigur hon. 

Fyri at hava búskaparvøkstur, innflyta mong europeisk lond arbeiðsmegi, og hetta er eisini galdandi í Íslandi.

Fáa sítt fyrsta barn, tá tær eru 28,2 ár

Men flestu útlendingarnir, sum koma til Íslands at arbeiða, eru eystureuropearar, og har er burðatíttleikin enn lægri enn í Íslandi, sigur professarin við Frettablaðið. 

Óløf Garðardóttir sigur, at royndir úr øðrum londum vísa, at besta leiðin at ganga fyri at fáa fólk at fáa sær fleiri børn, er at hækka um upphæddina, sum foreldur í barnsburðarfarloyvi fáa, umframt at leingja um sjálvt farloyvið.

Íslendskar kvinnur fáa sítt fyrsta barn tá tær eru 28,2 ár í miðal, skrivar Morgunblaðið.