Ov fáir fiskidagar kortini verða bátar fluttir

Teir fara at hava í miðal 22 fiskidagar tað, sum eftir er av árinum. Nú eru 81 bátar í bólki 5A, og teir hava 35 fisidagar eftir í miðal til nýggjárs.

Millum annað tí tekur Fiskivinnuráðið ikki undir við uppskotinum hjá Høgna Hoydal, landsstýrismanni, um at flyta bátar úr bólki 5B í bólk 5A.

Sambært tí uppskotinum skulu 637 fiskidagar hjá bátunum í bólki 5B skrásetast í bólki 5A. Grundarlagið hjá bátunum í bólki 5A er hótt, sigur Fiskivinnuráðið. 

Er longu linkað

Ráðið sigur eisini, at kunngerðin um býtið millum bólkarnar er longu linkað. Í bólki 5 eru útróðrarbátar, sum eru minni enn 15 tons.

Í bólki 5A eru bátaeigarar, sum hava útróður burturav, sum liva av útróðri. Hinir eru í bólki 5B.

Ummæli og ráðgeving

Lógin um Fiskivinnuráðið sigur, at øll týðandi fiskivinnumál og øll uppskot um lógir og kunngerðir skulu leggjast fyri Fiskivinnuráðið til ummælis. 

Ráðið er ráðgevandi, og landsstýrismanninum nýtist ikki at gera, sum Fiskivinnuráðið mælir til.

Høgni Hoydal ætlaði, at Fiskivinnuráðið viðgjørdi málið sum skundhoyring við teldusamskifti.

Men tá minst ein limur í Fiskivinnuráðnum ikki vildi tað, hevði ráðið skundfund seinnapartin í gjár.

Umsitingarætlan

Umsitingarætlanin fyri fiskidagaskipanina, sum fiskivinnan gjørdi í mai í ár, er eisini ein orsøk til, at Fiskivinnuráðið ikki mælir til at flyta fiskidagar úr bólki 5B í bólk 5A. Umsitingarætlanin skal fyrstu ferð brúkast næsta ár.

Fiskivinnuráðið heldur tað vera týdningarmikið, at fortreytirnar í skipanini ikki verða grundleggjandi broyttar, áðrenn ætlanin fer at virka.

Umsitingarætlanin sigur, at er ein fiskastovnur omanfyri ávíst mark og veiðutrýstið niðanfyri ávíst mark, kann fiskidagatalið vaksa.

Men fiskidagarnir verða færri, um ein stovnur er ov lítil, ella veiðitrýstið er ov stórt. Hetta skal ikki broytast, sigur Fiskivinnuráðið, sum ikki vil gera broytingar nú í bólki 5. Har eru útróðrarbátar, sum eru minni enn 15 tons.