Fara í Landsrættin við Nortwest Pelagic

Fiskimálaráðið hevur avgjørt at skjóta dómin hjá Føroya rætti í málinum um loyvini hjá reiðaríinum Northwest Pelagic inn fyri Eystari landsrætt.

Føroya rættur kolldømdi avgerðina hjá Fiskimálaráðnum at staðfesta avgerðina hjá Vørn um ikki at geva Northwest Pelagic loyvi at fiska, tí útlendingar hava ræði á felagnum, sambært Vørn og Fiskimálaráðnum.

Hóast dómurin hjá Føroya rætti er rættiliga greiður, hevur Fiskimálaráðið avgjørt at royna málið í Landsrættinum.

Rógvi Reinert, aðalstjóri í Fiskimálaráðnum, sigur, at tey hava vent hvørjum steini og eru komin til ta niðurstøðu, at málið skal roynast í tveimum rættum.

Fiskimálaráðið fer at krevja frídøming í Eystari landsrætti eins og í Føroya rætti.