Trump firtin

Amerikanski uttanríkisráðharrin, Mike Pompeo, tosaði í gjár í telefon við danska starvsbróður sín, Jeppe Kofoed, um møguleikan fyri størri samstarvi millum USA og Danmark í Arktis, eisini um Grønland.

Mike Pompeo rósti sterka sambandinum millum danir og amerikanarar, sigur amerikanska uttanríkisráðið í eini fráboðan.

Danski uttanríkisráðharrin boðin til USA

– Uttanríkisráðharrin takkaði Danmark fyri samstarvið sum sameindi hjá USA, sigur ein talskvinna fyri amerikanska uttanríkisráðið.

Danski uttanríkisráðharrin, Jeppe Kofoed, hevur skrivað á Twitter, at hann og Mike Pompeo hava váttað sterku bondini, sum framvegis eru millum Danmark og USA.

Jeppe Koefod sigur í samrøðu við TV2, at hann er boðin til USA á vitjan.

Ætlar sær ikki í orðadrátt

Donald Trump gjørdist firtin, tá Mette Frederiksen, forsætisráðharri, segði, at ætlan forsetans um at keypa Grønland var skilaleys. Tað var eftir øllum at døma orsøkin til, at Donald Trump avlýsti ferð sína til Danmarkar.

– Útsøgnin hjá Mette Frederiksen var andstyggilig og óhóskandi. Hon kundi bara svarað, at hon hevði ongan áhuga fyri málinum, sigur amerikanski forsetin.

Mette Frederiksen, forsætisráðharri, sigur, at hon ætlar sær ikki í orðadrátt við nakran, heldur ikki amerikanska forsetan, og Grønland stendur ikki á sølulista, sigur hon.