Tvær handtøkur afturat

Svenska løgreglan hevur tikið tveir menn aftrat í málinum um spreingingina uttan fyri bygningin hjá Skattastýrinum í Keypmannahavn 6. august.

Tað skrivar svenska blaðið, Sydsvenskan. Løgreglan í Keypmannahavn hevur váttað tíðindini. Óvist er, um teir báðir menninir játta ella nokta seg sekar.

Ein framvegis eftirlýstur

Nú eru tilsamans fýra persónar skuldsettir í málinum. Tríggir sita í varðhaldi, og ein gongur leysur, hóast hann hevur verið eftirlýstur um allan heim. 

Rætturin í Malmø avgjørdi fríggjadagin, at ein 22 ára gamal maður, sum situr varðhaldsfongslaður, skal útflýggjast Danmark. Óvist er, um maðurin fer at kæra avgerðina um at verða útflýggjaður.

Eitt fólk fekk skaða av spreingingini uttan fyri bygningin hjá Skattastýrinum í Keypmannahavn 6. august. Klædningurin á bygninginum fekk stóran skaða.