Loyvi at ala lúsatálmarar í Svínoynni

Heilsufrøðiliga starvsstovan gav týsdagin Sp/f Svínoyar rognkelsistøð loyvi til at ala rognkelsi á landi í Svínoy.

Føroyska alivinnan brúkar rognkelsi sum lúsatálmara.  Rognkelsi tekur laksalús.

Virksemið á rognkelsistøðini í Svínoynni er at ala yngul upp í eina stødd, har rognkelsini kunnu setast út í aliringarnar á sjónum.

Kann byrja nú

Við loyvisbrævinum týsdagin hevur alistøðin í Svínoy nú fingið øll neyðug loyvi til at fara undir at ala sambært alilógini. Virksemið hjá Svínoyar rognkelsistøð kann tí byrja alt fyri eitt.

Hetta er fyrsta aliloyvið, sum er boðið út alment í Føroyum, sigur Heilsufrøðiliga starvsstovan.

Svínoyar rognkelsistøð var einasti umsøkjari. Sjúrður Jacobsen í Svínoy eigur 60 prosent av Sp/f Svínoyar rognkelsistøð, og Bakkafrost eigur 40 prosent.