Leggja uppí, steðgar ófriðurin ikki

Carrie Lam segði á tíðindafundi í morgun, okkara tíð, at Kina kann leggja uppí við hermegi til tess at steðga harðskapinum.

Tað hevur verið ófriðarligt í Hongkong í fýra mánaðir, og fríggjadagin setti býarstýrið mótmælisfólkunum forboð fyri at hylja andlitið.

Akta ikki forboð

Men mótmælisfólkini akta ikki forboðið, og um vikuskiftið hava aftur verið harðir samanbrestir millum løgregluna og mótmælisfólk.

Carrie Lam hevur víst aftur, at ætlanin er at seta neyðrættarstøðu í verk, sum heimilar myndugleikunum at seta lógir í gildi móti mótmælisfólkunum.

Hongkong er fyrrverandi bretskt hjáland, men hevur síðani 1997 verið partur av Kina.