Dupult so stórt avkast í Danmark sum í Føroyum

Frá 2014 til 2018 fingu føroysku lívstryggingarfeløgini og eftirlønargrunnarnir í miðal bara helvtina so nógv fyri sínar íløgur sum feløgini og grunnarnir í Danmark fingu. 

Tryggingareftirlitið hevur kannað árliga íløguavkastið. Úrslitið er, at hjá teimum føroysku feløgunum var avkastið í miðal 2,6 prosent, í Danmark var tað 5,2 prosent.

Tryggingareftirlitið sigur, at í fjør var fall á partabrævamarknaðinum, sum gjørdi, at føroysku feløgini høvdu minus 1,5 prosent í avkasti, men avkastið hjá donsku feløgunum var minus 1,8 prosent.

Ein orsøk til lægra íløguavkastið hjá føroysku feløgunum 2014 - 2018 er, at føroysku feløgini hava sett ein størri part av íløgunum í stats- og realkreditlánsbrøv.

Partabrøv og fastognir

Donsk feløg hava gjørt fleiri íløgur í partabrøv og í grundir og bygningar, sigur Tryggingareftirlitið. Eftirlitið sigur, at lutfalsliga stórur munur er á miðal íløguavkastinum hjá teimum einstøku føroysku feløgunum.

Tryggingareftirlitið sigur, at avkastið av íløgunum hevur sum frá líður nógv at siga fyri tey, sum spara saman til eftirløn.

Eitt dømi er, at tann, sum tjenar 30.000 krónur um mánaðin og rindar 15 prosent í eftirløn, gevur árligt avkast, sum er 2,6 prosent, 2,3 milliónir krónur.

Er avkastið 5,2 prosent, er samansparda eftirlønin 4,3 milliónir krónur, tá spart er saman í 40 ár.