Ruðuleikin er fullkomin í Bretlandi

Tað eydnaðist ikki Boris Johnson at fáa atkvøðugreiðslu um avtaluna, sum stjórnin hevur gjørt við ES um Brexit.

Orsøkin er, at ein lítil meiriluti av Undirhúsinum atkvøddi fyri einum uppskoti, sum ikki loyvir eini atkvøðugreiðslu um avtaluna fyrr enn bretska lóggávan, sum hoyrir til Brexit, er gjørd.

Ivasamt um Johnson aktar tingið

Samtyktin í dag hevur eisini við sær, at Boris Johnson skal senda áheitan til ES um at útseta Brexit til formliga lóggávan í Bretlandi er gjørd. 

Sambært serfrøðingum er sera ivasamt, um tað letur seg gera at fáa alla lóggávu við so stuttum skoðbrái og undir øllum umstøðum, so hevur forsætismálaráðharrin nú fingið álagt at heita á ES um at fáa freistina 31. oktober útsetta. Ivasamt er tó, um hann er sinnaður at akta tingið. 

Atkvøðugreiðslan um Brexit avtaluna verður væntandi í komandi viku. Tíggjutúsundatals mótmælisfólk hava allan dagin mótmælt uttanfyri bretska tingið í London. Fleiri politikarar máttu hava politieskportu gjøgnum mannamúgvuna.