– Tíðin farin frá námsætlanunum

– Vit eiga at fara frá hugsanini um eina námsætlan, har tað verða reksað ov nógv faklig mál upp, sum lærarin skal halda seg til, til eina námsætlan við fáum grundleggjandi fakligum málum og fleiri neyvt orðaðum støðismálum.

Tíðin er farin frá námsætlanunum í Fólkaskúlanum. Tað heldur formaðurin í Føroya Lærarafelag, Jacob Eli Olsen. Allar lærugreinar í fólkaskúlanum hava námsætlan, sum lýsir, hvat endamálið og innihaldið í lærugreinini er.

– Vansin við okkara námsætlanum er, at har eru ov nógv mál, sum skulu náast, sigur Jacob Eli Olsen, formaður í Føroya Lærarafelag, við Skúlablaðið.

Fleiri grannalond hava broytt sínar skipanir

Formaðurin vísir á, at bæði danir og norðmenn hava broytt sínar námsætlanir, so tær hava munandi færri faklig førleikamál, og ístaðin leggja dent á arbeiðshættir, soleiðis at næmingarnir kunnu fara í dýpdina í einstøku evnunum.

– Okkara næmingar klára seg ikki væl í arbeiðsháttinum, samanborið við næmingar í øðrum londum, og hetta er størsti munurin á okkara næmingum og næmingum í hinum Norðurlondununum.

– Teir (næmingarnir, red.) duga rætt og slætt ikki nóg væl at brúka ta vitanina, teir ogna sær, sigur Jacob Eli Olsen millum annað við Skúlablaðið.