Flogfar datt niður í eldhav

Tríggir amerikanskir sløkkiliðsmenn lótu lív, tá eitt flogfar, sum verður brúkt at sløkkja eld, datt niður í Avstralia tíðliga í morgun, okkara tíð, skrivar The Guardian.

Flogfarið var av slagnum C-130 Hercules.

Tað varð nýtt sum eitt sonevnt vatnbumbu-flogfar í stríðnum ímóti skógareldunum. Flogfarið var í Snowy Mountains-økinum í landspartinum, New South Wales, tá ið tað fekk trupulleikar.

Snowy Mountains er skamt sunnan fyri høvuðsstaðin, Canberra.

Forboð at flúgva

Flogfarið datt niður í einum øki, har skógareldar herja, og har torført er hjá sløkkiliðsfólkum at sleppa framat.

Myndugleikarnir í Avstralia hava fyribils bannað líknandi flogførum, sum verða brúkt at sløkkja skógareldar, at flúgva.

C-130 Hercules flogførini taka 15.000 litrar av vatni, og tey hava stóran týdning í sløkkiarbeiðnum.