Iranar í Danmark skuldsettir fyri njósning

Fýra iranar í Danmark eru skuldsettir fyri at njósnast til frama fyri Saudiarabia.

Skuldsetingin hevur samband við eitt mál frá 2018, har fregnartænastan hjá donsku løgregluni, PET, heldur, at iranska fregnartænastan hevði ætlanir um at drepa ein irana í Danmark, skrivar Danmarks Radio.

Løgreglan í Keypmannahavn hevur skuldsett ein navnnevndan persón úr eini iranskari fregnartænastu fyri at hava havt leiklut í eini drápsroynd, og fyri at hava njósnast móti Danmark.

Hann er fongslaður in absentia, sigur PET-stjórin, Finn Borch Andersen. 

ASMLA

Somuleiðis eru tríggir menn úr bólkinum, ASMLA, skuldsettir. Bólkurin er sera atfinningarsamur móti iranska stýrinum.

Teir eru skuldsettir fyri at hava njósnast til frama fyri Saudiarabia móti persónum í Danmark millum 2012 og 2018. Teir tríggir eru handtiknir og skulu grundlógaravhoyrast í morgin. 

Enn er ikki greitt, hvat menninir siga til skuldsetingina. 

 - Talan er um eitt torgreitt mál, har Saudiarabia og Iran hava tikið sínar ósemju við til Danmarkar, sigur Finn Borch Andersen, sambært DR.DK.