ES-skip vilja sleppa at fiska í bretskum sjógvi

Tað er eitt ófrávíkiligt krav frá ES, at skip úr ES-londunum sleppa at fiska í bretskum sjógvi.

Tað sigur samráðingarleiðarin hjá ES, Michel Barnier, nú samráðingarnar um framtíðar samstarvið millum partarnar byrja.

Bretland fær ikki líka góðar sømdir, sum landið hevði fingið sum limur í samveldinum, men fyri tað kann talan verða um eina góða avtalu, leggur samráðingarleiðarin aftrat, skrivar KNR.

Í eini røðu í London í gjár, segði Boris Johnson, forsætisráðharri, at Bretland ikki sum er fer at vísa krøvunum frá ES aftur.

Fult ræði í hesum árinum 

- Vit fara ikki at seta okkum upp ímóti at gera avtalu um fiskirættindi, men eitt krav verður, at Bretland seinast í hesum árinum hevur fult ræði á bretska sjóøkinum, sigur Johnson.

Londini hava 11 mánaðir at finna eina loysn á teimum viðurskiftum, sum skulu vera galdandi í framtíðini. Semja er kortini um, at skotbráið kann leingjast í upp til tvey ár, um partarnir semjast um tað.

Boris Johnson hevur longu sagt, at allar avtalur skulu vera gjørdar, áðrenn árið er liðið, og at freistin ikki verður longd.