Eysturoyartunnilin verður kanska seinkaður

Eysturoyartunnilin verður kanska ikki tikin í nýtslu fyrr enn fyrst í 2021. Tað sigur Teitur Samuelsen, stjóri í P/f Eystur- og Sandoyartunlum. 

Eftir ætlan skuldi tunnilin takast í nýtslu 1. desember. Í løtuni verður arbeitt við at vatntryggja tunnilin.Tað merkir, at vatn, sum seyrar niður gjøgnum grótið, verður leitt burtur.

Hetta arbeiðið tekur longur tíð enn væntað, men tað gevur ein betri tunnil í framtíðini, sigur Teitur Samuelsen.

Tískil kann tað fara um árskiftið, áðrenn Eysturoyartunnilin verður tikin í nýtslu, men tað ber ikki til at siga nakað neyvari í løtuni, sigur stjórin í Eystur- og Sandoyartunlunum.