Skal verða lættari at vátta faðirskapin

Nú skal verða lættari hjá pápum at vátta faðirskapin at einum barni. Almannamálaráðið hevur lagt fram eitt lógaruppskot

Lógaruppskotið strikar kravið um, at pápin - um hann ikki er giftur við mammuni - skal møta persónliga á Familjufyrisitingini í Havn fyri at vátta faðirskapin at barninum.

Ístaðin verður ásett, at pápin við talgildari undirskrift kann vátta faðirskapin heimanífrá, tá tænastuportalurin og talgildi samleikin eru klárir at taka í nýtslu seinni í ár.

Skal kunna váttast talgilt

Áðrenn málsøkið persónsrættur, familjurættur og arvarættur varð yvirtikið, viðgjørdi politiið faðirskapsmál. Tað kundi eisini gerast aðrastaðni enn í Havn.

Kravið um at møta persónliga á Familjufyrisitingini er óheppið fyri fólk, sum ikki búgva í miðstaðarøkinum, stendur í lógaruppskotinum.

Tí er ætlanin at broyta lógina, so menn við talgildari undirskrift kunnu vátta, at teir eiga eitt barn.