Hægri sigarettprísur fær fleiri at leggja av

Príshækkingin upp á sigarettir hevur fingið fleiri danir at royna at leggja av at roykja, skrivar danska krinpvarpið, DR, á heimasíðuni.

Bæði kommunur og Kræftens Bekæmpelse siga, at tey fáa nógvar fyrispurningar frá fólki, sum vilja sleppa av við sigarettirnar.

– Nógv hava havt ætlanir um at gevast leingi, men taka nú stigið, tí sigarettirnar verða dýrari, sigur Anja Pedersen, sum gevur teimum, ið ætla sær at gevast, góð ráð í Slagelse kommunu.

Bíðilisti til roykisteðg-skeið

Anja Pedersen sigur, at tað er bíðilisti í kommununi til skeiðini, sum hjálpa fólki at leggja av at roykja. Í Holbæk og í Stevn síggja tey sama rák. Tað eru serliga tey ungu, sum eru ávirkað av komandi príshækkingini.

Fleiri nýta eisini appina, E-kvit, hjá Kræftens Bekæmpelse, at leggja av við. Felagsskapurin staðfestir, at 60 prosent fleiri hava meldað seg til, at leggja av í ár samanborið við í fjør. 

– Tað er ein stór øking. Og tað er helst orsakað av umrøðuni, sum príshækkingin á sigarettum hevur fingið í miðlunum, sigur Niels Them Kjær frá Kræftens Bekæmpelse, sambært DR.