Løgtingið: Viðgera lántøku og svartkjaft í dag

Løgtingið fer í dag at viðgera ætlanina hjá landsstýrinum um at læna 1,6 milliardir krónur. Uppskotið kom í tingið fríggjadagin.

Tá kom eisini uppskotið um at lata góð 40.000 tons av svartkjafti, sum vóru ætlað til vinnuligar royndir og verkætlanir, sum felagskvotu við hámarki.

Tað uppskotið fær eisini fyrstu viðgerð í dag.

Starvsmenn og arbeiðsmarknaður

Á tingfundinum í dag, sum byrjar kl.10 eru eisini fimm onnur mál. Javnaðarflokkurin hevur uppskot til samtyktar um at dagføra lógina um starvsmenn.

Starvsmannalógin kom í 1958, og hon er bara dagførd eina ferð, tað var í 1970.

Tjóðveldi hevur uppskot til samtyktar um ikki at loyva mismuni á arbeiðsmarknaðinum eitt nú vegna aldur, og um fjarstørv, - um at almenn størv í nógv størri mun kunnu verða sett sum fjarstørv kring landið. 

Arrestin í Mjørkadali

Rósa Samuelsen og Djóni Nolsøe Joensen hava uppskot til samtyktar um at kanna og taka neyðug stig til, at umstøðurnar í Arrestini í Mjørkadali verða nøktandi og á sama stigi sum í danska fongsulsverkinum annars.

Løgtingið hevur sett tey bæði at hava eftirlit við varðhaldsfangum.

Og Jørgen Niclasen, landsstýrismaður, hevur uppskot um at broyta tonsaskattalógina, sum eisini skal umfata serskip.

Tingnevndirnar hava fundir í hesari vikuni og næstu vikurnar. Rættarnevndin hevur fund seinnapartin í dag.