ALS-stýrið skal viðgera innlitsumbøn av nýggjum

Helgi Abrahamsen, landsstýrismaður, hevur biðið Als um at viðgera av nýggjum avgerðina um ikki at geva innlit í, hvørjar fyritøkur brúka lønarískoytisskipanina.

Als er biðin um at kanna, um meirinnlit kann latast í tann mun, tað ber til. 

Helgi Abrahamsen hevur svarað Beintu Løwe, løgtingskvinnu, sum spurdi, um almenningurin og fjølmiðlar fáa at vita, hvørjar fyritøkur brúka hjálparpakkarnar hjá landinum.

Stýrið hjá Als fer at viðgera áheitanina frá landsstýrismanninum á næsta fundi sínum. 

Persónsupplýsingar

Grundgevingin hjá Als fyri ikki at geva innlit er tann, at verður navnið hjá fyritøkuni nevnt, ber eisini til at eyðmerkja fólkini, sum fáa lønarískoyti.

Tað er brot á persónsupplýsingarlógina.

Men møguliga gera somu atlit seg ikki galdandi fyri fyritøkur, sum hava fleiri enn til dømis fimm ella 10 starvsfólk, sigur Helgi Abrahamsen í svarinum.