Rúsviðgerð krevur góðkenning

Stovnarnir, sum veita rúsviðgerð, skulu nú søkja um góðkenning frá Heilsutrygd.

Kunngerðin um tað er lýst og komin í gildi. Lógin kom á nýggjárinum.

Sambært kunngerðini kann viðgerðarstovnur vera almennur stovnur, privatur stovnur ella sjálvsognarstovnur.

Serstøk viðgerðarætlan skal gerast fyri hvørt fólk, sum fer á viðgerðarstovn.

Útbúgving kravd

Viðgerðarstarvsfólkini skulu hava útbúgving, sum er góðkend í Íslandi, Noregi, Bretlandi, ella í ES-landi.

Harumframt skal í minsta lagi eitt starvsfólk vera løggildur sjúkrarøktarfrøðingur.

Lækni og sálarfrøðingur við løggilding skulu vera knýttir at viðgerðarstovninum.

Sambært kunngerðini skulu viðgerðarstovnar hava hóskandi høli, sum eru innrættað til endamálið. 

Fólk, sum eru til viðgerðar, eiga at hava egið kamar í tann mun, tað ber til, og altíð, um tey biðja um tað.