Stýrisskipanin verður ikki broytt

Stýriskipanin verður ikki broytt í hesum umfarinum.

Meirilutin í grein 25 nevndini, sum hevur viðgjørt uppskotið hjá Ingilín Didriksen Strøm í Javnaðarflokkinum og Hervør Pálsdóttur í Tjóðveldi, mælir frá at samtykkja uppskotið. Umframt samgonguna er Sjálvstýri í meirilutanum. 

Grein 25 nevndin hevði fimm fundir um uppskotið.

Fyrireikingararbeiði

Yvirskipað heldur meirilutin, at áðrenn komið verður í løgtingið við broytingum í einari so týdningarmiklari og prinsipiellari lóg, eigur veruligt fyrireikingararbeiði at verða gjørt, har øll politiska skipanin saman við serfrøði á økinum er umboðað.

Alt eigur at verða gjørt fyri at hava so breitt grundarlag og at finna so víðfevnda semju sum gjørligt. Uppskotið er at broyta orðið maður í stýriskipanarlógini til fólk.

Framsókn tekur undir við broytingini

Saman við Ingilín Didriksen Strøm og Hervør Pálsdóttur, sum eiga uppskotið, mælir Bjarni Kárason Petersen í Framsókn til at samtykkja tað.

Tey halda ikki, at tað er ein grundgeving fyri at fella uppskotið, at aðrar broytingar eisini skulu eisini gerast í stýriskipanarlógini.

Onnur viðgerð og atkvøðugreiðsla verða á løgtingsfundinum í morgin.