Umsitingin ivast í uppskoti um upplatingartíðir

Eitt uppskot um broyting í løgtingslógini um matstovuvirksemi og gistingarhúsvirksemi er í dag komið í Løgtingið, har Helgi Abrahamsen, landsstýrismaður við vinnumálum, skjýtur upp at skoyta soljóðandi orðing upp í lógina: 

"Fyri at forða fyri smittuspjaðing, kann landsstýrismaðurin fyribils og í avmarkað tíðarskeið avmarka vanligu upplatingartíðirnar og afturlatingartíðirnar, eins og landsstýrismaðurin kann áseta mest loyvda tal av gestum."

Við øðrum orðum vil landsstýrismaðurin hava eina lógarheimild til at gera av, hvussu leingi til dømis skeinkistøð kunnu hava opið.

Men tað er ivasamt, um Løgtingið yvirhøvur hevur heimild at broyta hesa lógina.

Umsitingin ivast

Løgtingsumsitingin hevur nevniliga gjørt vart við, at ætlanin við hesum lógaruppskotinum er at fremja broytingar og harvið áseta reglur, sum nátúrliga vildu verið reguleraðar í Epidemilógini, sum er danskt málsøki. Tað er tí rættiliga ivasamt, um Løgtingið hevur lóggávuheimild á økinum.

"Um hetta lógaruppskotið verður samtykt, kann spurningur setast við, um Løgtingið í roynd og veru hevur framt eina lutvísa yvirtøku av økinum "Heilsumál", ella um Løgtingið ger seg inn á lóggávuheimildina hjá donskum myndugleikum", sigur Løgtingsumsitingin í skrivi til Umhvørvis- og vinnumálaráðið.

Uppskotið frá Vinnumálaráðnum hevur ongar ásetingar um revsing, men víst verður til grein 23, stk. 2 nr. 2 í matstovulógini, har tað stendur, at: "við sekt ella fongsli upp í 4 mánaðir verður revsaður tann, sum ikki lýðir boð ella forboð, givin eftir løgtingslógini ella eftir reglum, givnar við heimild í løgtingslógini."