Ítróttarfeløg kunnu nú søkja um stuðul

ÍSF hevur gjørt eina reglugerð um, hvussu søkjast kann um tær fýra millióninar, sum løgtingið hevur játtað í COVID-19 stuðli til ítróttafeløg og ítróttasambondini.

Ítrótturin kann søkja um pengar fyri mistar inntøkur frá 12. mars til 30. juni. Størsti stuðulin er 250.000 krónur, tann minsti er 20.000 krónur.

Freistin er 31. august

Mista inntøkan skal roknast eftir miðal inntøkuni í 2019 og 2018. Freistin at søkja um stuðulin er 31. august í ár.

ÍSF hevur roknað út, at ítróttafeløgini missa okkurt um átta milliónir krónur í inntøkum í summar.

Sambondini í ÍSF og limafeløg tess kunnu søkja um COVID-19 stuðul. Starvsnevndin í ÍSF ger av eftir innstilling frá umsitingini hjá ÍSF, hvør fær stuðul.