Nýggjur kanningarháttur: Svar eftir 90 minuttum

Longu hálvan annan tíma eftir, at tú ert kannaður fyri koronu ella beinkrím í Bretlandi, ber til at fáa úrslitið.

– At kanningarúrslitini verða tøk eftir 90 minuttum, fer at hava við sær, at tað ber til nógv skjótari at staðfesta, hvussu nógv smittan hevur breitt seg, sigur bretski heilsumálaráðharrin, Matt Hancock.

Fleiri bíða leingi, sum nú er

Í løtuni fáa tríggir fjórðingar av teimum, sum verða kannað, svar eftir einum samdøgri. Ein fjórðingur noyðist at bíða eftir svari i tvey samdøgur.

Tað er ikki neyðugt hjá heilsustarvsfólki at hava eina serliga útbúgving at brúka nýggja kanningarháttin, og tað ber til at kanna fólk fyri koronu á starvsstovum, sum kunnu flytast.

– Tað er ein stórur fyrimunur, at hesar kanningar kunnu staðfesta beinkrím ella COVID-19 eftir so stuttari tíð, sigur heilsumálaráðharrin í Bretlandi.