Yantarnyy leggur fiskin upp í Norðhavnini

Russiski frystitrolarin Yantarnyy, sum hevur ligið í Nólsoyarfirði í longri tíð við fullari last, fer nú til Klaksvíkar, har hann skal leggja veiðuna upp í Norðhavnini í Ánunum.

Yantarnyy kom á Oyrareingir 23.august, eftir at hava verið til fiskiskap norðanfyri.

29 av manningini, sum telur 77, vístu seg at vera smittaðir av koronu.

Eitt frystifarmaskip var komið til Føroya at taka fiskin hjá Yantarnyy. Men farmaskipið fór úr Føroyum aftur, uttan at hava tikið fiskin hjá russiska trolaranum.

Í gjár vórðu teir av manningini á Yantarnyy, sum vóru smittaðir av korona, skrásettir at verða frískir aftur.

Tekur nakrar dagar at landa

Faroe Ship, sum umboðar russiska skipið í Føroyum, hevur vent sær til Klaksvíkar kommununu og biðið um at sleppa leggja veiðuna hjá Yantarnyy upp í frystihúsinum í Norðhavnini. 

Yantarnyy hevur fingið loyvi at koma til Klaksvíkar í dag at landa. Væntandi tekur tað tveir til tríggjar dagar at landa skipið.

Borgarar í Ánunum hava fingið at vita frá Klaksvíkar kommunu, at kommunan hevur verið í sambandi við landslæknan, sum heldur tað vera ráðiligt, at skipið kemur til lands. 

Sagt verður eisini, at fyrilit verða tikin fyri at tryggja, at ein møgulig smitta umborð á skipinum ikki kemur í land.