Miðlastuðul: Skulu lýsa donsk samfelagsviðurskifti

Grønlendski miðilin, Sermitsiaq, vendir sær eisini til danir og lýsir donsk samfelagsviðurskifti, ella viðger og lýsir hendingar í øðrum londum úr einum donskum sjónarhorni.

Tí hevur Sermitsiaq fingið danskan miðlastuðul.

Joy Mogensen, mentamálaráðharri, hevur svarað Sjúrði Skaale, fólkatingsmanni, sum spurdi, um føroyskir miðlar kunnu fáa stuðul úr Danmark, tá grønlendskir miðlar kunnu.

Tríggjar milliónir í stuðli

Orsøkin til spurningin er, at grønlendski miðilin, Sermitsiaq, hevur fingið 3,1 mió. kr. frá Medienævnet í Danmark.

Stuðulin kallast Medienævnets redaktionelle produktionsstøtte.

Joy Mogensen sigur, at skulu føroyskir miðlar fáa stuðul úr Danmark, skulu teir millum annað venda sær til danir og lýsa donsk samfelagsviðurskifti, ella viðgera og lýsa hendingar í øðrum londum úr einum donskum sjónarhorni.