BankNordik 156 mió. kr. í avlopi fyri skatt

BankNordik hevði 156 mió. kr. í yvirskoti fyri skatt í triðja ársfjórðingi í ár. Í triðja ársfjórðingi í fjør var yvirskotið 201 millión.

Bæði innlán og útlán minkaðu í triðja ársfjórðingi.

Útlánini fóru úr tíggju milliardum triðja ársfjórðing í fjør niður í 9,8 milliardir. Innlánini fóru úr 13,6 milliardum niður í 12,9 milliardir.

Solvensurin hækkaði úr 21 prosentum upp í 24,9 prosent.

140-160 mió. kr.

Bankin væntar nú, at nettoúrslitið, t.e. úrslitið eftir skatt, í 2020 verður millum 140 og 160 mió. kr. 

Við ársbyrjan var væntaða úrslitið millum 100 og 150 mió. kr.

BankNordik sigur, at korona hevur ikki ávirkað fíggjarligu gongdina hjá bankanum so nógv sum upprunaliga væntað.

Bankin sigur, at í triðja ársfjórðingi var nærum eingin, sum bað um at fáa lánsgjøld útsett.

50 mió. settar av til tap

Ávísar vinnur hava tó havt stóra afturgongd, og tí eru settar av 50 mió. kr. til møgulig tap. Talið var 35 milliónir kr.

Dótturfelagið Skyn selur nógv hús. Korona tykist ikki at hava ávirkað prísleguna. 

Tó er mynstrið broytt nakað seinastu tíðina. Alsamt fleiri keypa ella byggja bústað uttan fyri høvuðsstaðarøkið, sigur BankNordik.