Óvist hvussu langt er millum Biden og Trump

Óvissa tykist vera um, hvussu lítið - ella nógv - er millum Joe Biden og Donald Trump eftir forsetavalið í gjár, skrivar Ritzau.

Forsetavalevnið hjá demokratunum, Joe biden, er sambært fyribils úrslitum og forsagnum hjá AP sera tætt við at kunna nevna seg næsta forsetan í USA.

Sambært tíðindastovuni AP hevur Biden í morgun tryggjað sær 264 valmenn av teimum 270, ið skulu til fyri at tryggja sær embætið sum forseti.

Tað tykist kortini vera eitt sindur av óvissu um teir 11 valmenninar í Arizona, tí í løtuni hava bara  AP og Fox News tilnevnt Biden vinnara í Arizona.

Fleiri aðrir tíðindamiðlar vilja einki siga um, hvør hevur vunnið teir 11 valmenninar í statinum, skrivar Ritzau.

Ein ella tveir statir aftrat

Um forsøgnin hjá tíðindastovuni AP er eftirfarandi, skal Biden bara vinna ein ella tveir statir aftrat fyri at tryggja sær sigurin á valinum.

Biden kom eitt fet nærri sigrinum í nátt okkara tíð, tá hann - sambært forsøgnini hjá AP - vann teir 16 valmenninar í Michigan.

Tað eru fleiri amerikanskir tíðindamiðlar, sum hava tikið forsøgnirnar hjá AP til sín.

Forsøgnirnar hjá AP byggja á taldar atkvøður, kanningar á valstøðum og forsøgnina á valstøðunum.

Tá sannlíkindini í útrokningunum hjá AP vísa, at mótvalevnið ongan møguleika hevur at fara framum, útnevnir AP vinnaran í statinum.