Mogens Jensen leggur frá sær

Mogens Jensen leggur frá sær sum matvøruráðharri í Danmark, í kjalarvørrinum av gøluni um minkarnar, sum eru tiknir av.

Mogens Jensen sigur við dansk kringvarpið, at hann hevur ikki neyðugu undirtøkuna í fólkatinginum, og tí hevur hann boðað forsætisráðharranum frá, at hann leggur frá sær.

Mogens Jensen viðurkennir, at mistøk eru gjørd í málinum um minkarnar.

- Tað er greitt, at mistøk eru gjørd í mínari ráðharrastovu, og tað taki eg ábyrgdina av. Haraftrat er tað mín meting, at eg havi ikki neyðugu politisku undirtøkuna longur, sigur Mogens Jensen.

Hann ger samstundis greitt, at hann verður verandi í politikki. 

Mogens Jensen hevur umsitið ikki færri enn fýra málsøki sum ráðharri: matvørur, fiskivinnu, javnstøðu og norðurlendskt samstarv.