Sild og svartkjaftur missa góðkenningina

Tað boðar Marine Stewardship Council frá, sambært heimasíðuni seafoodsource.com MSC-góðkenning verður latin fyri burðardyggan fiskiskap.

MSC tekur góðkenningina aftur, tí ov nógv verður fiskað av sild og svartkjafti í mun til vísindaligu tilmælini frá ICES, sigur Marine Stewardship Council.

MSC heitir tí á ES, Bretland, Ísland, Føroyar, Noreg, Russland og Grønland um at tryggja silda- og svartkjaftastovnarnar - bæði yvir styttri og longri tíð.

Góðkenningin tikin aftur

MSC ávaraði fyrr í ár strandarlondini um, at tað var møguleiki fyri, at tey mistu MSC-góðkenningina, og nú verður góðkenningin tikin aftur. 

Sambært MSC, fiskaðu hesi londini 32 prosent meira sild í 2019 enn ICES mælti til. Í fjør misti eisini makrelurin sína MSC-góðkenning.

MSC góðkennir burðardygga veiðu, og lættari er at selja fisk og fáa meira fyri hann, hevur hann MSC-góðkenning.