Dátueftirlitið skal bara hava eftirlit

Tjóðveldi heldur tað vera skeivt, at Dátueftirlitið ikki longur skal geva loyvi til at seta upp vakmyndatól.

Nú skal Dátueftirlitið bara vera eftirlit.

Rættarnevndin hjá løgtinginum hevur viðgjørt uppskotið hjá landsstýrinum um vakmyndatól.

Meirilutin fyri

Meirilutin í nevndini tekur undir við uppskotinum. Men minnilutin í nevndini, Sirið Stenberg og Hervør Pálsdóttir í Tjóðveldi, mælir frá at samtykkja tað.

Sambært lógaruppskotinum skal Dátueftirlitið ikki longur geva loyvi til at seta upp vakmyndatól.

Men tey, sum seta upp vakmyndatól, skulu boða Dátueftirlitinum frá hesum.  

Dátueftirlitið skal hava eftirlit við vakmyndatólum.

Gongur ov nær

Sirið Stenberg og Hervør Pálsdóttir siga tað vera álvarslgt, at til ber at hyggja eftir so at siga øllum fólkum. 

Uppskotið gongur fólki ov nær, halda tær. Persónliga frælsið verður skert. Vandi er fyri, at viðkvæmar persónupplýsingar kunnu koma óviðkomandi í hendi.

Eisini verður vandan størri fyri, at vakmyndatól verða brúkt skeivt.