Vilja hava hjálp frá norska statinum

Kanningarstovurnar eru undir stórum trýsti, skrivar norska kringvaprið, NRK.

Seinastu vikurnar hevur smittuverndin fingið avbjóðingar í eitt nú Bergen, Tromsø og Sør-Varanger, tí russiskir trolarar eru komnir inn.

Sør-Varanger-kommuna skrivar í tíðindaskrivi, at á tollaksmessu lá russiski trolarin, Vityaz, við bryggju í Kirkenes. Tey 34 umborð vórðu kannað henda dagin og ein hevur fingið staðfest koronu. 

Drude Bratlien, smittuverndarlækni, sigur við NRK, at illgruni er um, at fleiri av manningini eru smittað umborð. 

Manning smittað

Reiðaríið í Murmansk, Nord Pilgrim, eigur trolaran.Og tað sama reiðarí, sum eigur trolaran, Obelay, sum 5. oktober kom inn á Tromsø, og umborð vóru 24 av 34 umborð smittað.

Fyrst í hesum mánaðinum lógu tríggir russiskir trolarar við bryggju í Sula í Sunnmøre. Har vóru tilsamans 44 fólk smittað.

Okkurt má gerast

Virkandi borgarstjórin í Sør-Vanger kommunu, Pål Gabrielsen, er stúrin.

- Heldur hetta fram, og staturin einki ger, so kunnu vit fáa stórar trupulleikar. Vit kunnu ikki standa og hyggja at hesi gongdini, og einki gera, sigur varaborgarstjórin.

Kommunan hevur eitt smittu-gistingarhús, men har er avmarkað pláss.

- Vit hava so dánt umstøður at taka í móti okkara egnu íbúgvum. Nú má staturin gera nakað, sigur virkandi borgarstjórin í SørVanger, við norska kringvaprið.