Húsarhald bjartskygd

Handilsvinna ella smásøla hevur treystitalið 13. Tað var 15 í juni í fjør og 29 fyri einum ári síðani. Hetta er nógv samanborið við hinar fýra bólkarnar, sum eru við í konjunkturbarometrinum.

Vanliga fólkið, ella húsarhaldini, eru á øðrum plássi við treystitalinum sjey. Tað var null í juni og fimm í januar í fjør. Síðani koma minustølini.

Byggivinnan hevur minus 24, tað var minus 34 í juni og minus eitt í januar í fjør. Tilfeingisvinnan og íðnaðurin hevur trystitalið minus 19, tað var ávikavist minus 28 og pluss 35 í fjør.

Treystitalið var í støðugari legu

Tænastuvinnan hevur nú minus sjey. Har var treystitalið minus 13 í juni og pluss 53 í januar í fjør. Í okkurt um trý ár fyri koronu, var heildartreystitalið í Føroyum í støðugari legu.

Men frá at vera 32 í januar í fjør, áðrenn korona kom, fór treystitalið heilt niður í minus 16 í juni í fjør. Nú, í januar í ár, er tað minus níggju. Tað er hækkað sjey stig seinasta hálva árið.

Konjunkturbarometrið sigur, hvussu fólk og vinna halda, at tíðirnar eru. Tey verða spurd tvær ferðir um árið. Burturúr svørunum fæst so treystitalið.